Baled ar gychwyn ail ysgol ddwyieithog Gorllewin Morgannwg
Saith mlynedd nôl, ryw bnawn o Sul,
Yn sobor, o nas gwelsit,
Sgrifennodd Glanville at John Beale,
Ond meddai’r mul ‘I’ll file it’.
Fe alwyd cwrdd rhieni brwd,
A wir, fe ddwedaf wrthyt,
Anfonwyd memo at y cwd,
Ond meddai eto, ‘File it’.
I mewn i’r Guildhall aeth dros fil
A llanw pob un exit.
Ond beth ddywedodd Mr Beale?
‘Ry’ch chi’n elît, so file it.’
Ond cynnig Sandfields wnaeth yn wir,
Heb wybod hefyd rywsut
Na wnâi rhieni doeth y sir
Roi croeso, ond dweud ‘file it’.
‘Ni chewch chi well’, medd G’noro Jones
Ond dilyn geiriau Tebbit
A wnaeth rhieni, ‘Gwlych dy drôns,
Dos ar dy feic, a ‘file it’.
A John a Randolph wrth y llyw,
A Gareth fel rhyw farcut,
Ni roddwyd diolch am gael byw
Gan wŷr y sir a’u ‘file it’.
Nes yn y diwedd nid oedd dim
I’w wneud ond rywsut-rywsut
Roi ail ysgol i ni’n chwim,
Heb siw na miw am ‘file it’.
1984
Mae’r oll yn awr yn eu bedd:
Glanville: y bargyfreithiwr Glanville Jones, nad oedd bob tro’n sobor
John Beale: y cyfarwyddwr addysg gwrth-Gymraeg
Gwynoro Jones: gwleidydd gwamal
Tebbit: y Tori a ddywedodd wrth y di-waith i fynd ar eu beic
John: Dr John Davies, ysgrifennydd ymgyrch y rhieni
Randolph: Randolph Jenkins, un o brif ymgyrchwyr y rhieni
Gareth: y Parch Gareth Thomas, un o arweinwyr yr ymgyrch