Dyna gwestiwn y cylchgronau.
Etyb rhai am bethau gwych i’w cyflawni,
mynd allan gyda sbloet.
Ond hyn wnaf i:
fe af i’r siopau
yn bennaf er mwyn cerdded a chael awyr iach
a chael cip ar y môr.
Bydd robin goch ac ambell dderyn arall yn hercian o gwmpas,
a’r aderyn du’n chwibanu ar frig y goeden.
Fe welaf y magnolia’n agor yn syfrdanol
a blodau’r coed ceirios yn drwch.
Yna bydd y caserol gen i’n barod
a phwdin reis
ac eisteddaf a darllen ychydig
gan edmygu’r bobl ifanc
sydd mewn ffordd wahanol i ni’n bwrw ymlaen gyda’u doniau
a hynny yn Gymraeg.
Gwgaf yn feddyliol wrth ddarllen am wleidyddion
sy’n tynnu sylw atyn nhw’u hunain
gan lesteirio meddwl call am ddyfodol i’n hiaith.
ond dyna ni,
darllenaf eto
gan weld y coed ar ochrau’r ardd yn dechrau deilio,
a blodau coch y camelia’n disgyn.
Rhof hadau i’r adar (a’r gwiwerod)
a chymryd saib i gyfeiliant Brahms
nes y bydd rhywrai hoff yn galw.
Yna byddaf barod, os bydd angen,
i gymryd fy rhan dragwyddol
yn llychyn o’r sêr.