Fe ddônt yn ôl i’w gwâl,
Y rhai anniddig,
All angau ddim mo’u dal
Ond am ychydig
—
I gwblhau eu taith
Ni chawsant gyfle;
Gadawsant dwrn o waith,
Mil dyletswydde.
—
Nid pan fo’r haul yn dân
Y dônt i’n ceisio,
Na phan fo’n wyll achlân
Na phryd noswylio.
—
Ond dônt pan fo hi’n nos
A’r byd yn cysgu,
Heb nef mewn tref na rhos
Yn gallu’u tarfu.
—
Pan fydd meddyliau’r llawr
Yn rhydd i deithio,
Pan fydd tywyllwch mawr
Fe gânt gymuno.
—
Fe’u gwelais lawer gwaith
A hwythau weithiau
Yn diodde’r boen a’r graith
A’u rhoes i angau.
—
Bryd arall buont lon
A chawsom sgwrsio
Heb arwydd o un don
Yn dod i’w suddo.
—
Ond buan daw y dydd
A’i oriau meithion
Ac yna ffônt yn rhydd
O fyd y caethion.