Yn null America
Sut bydd y ffarwél ola?
A fydd munudyn seremoni?
Wedi oes o wres,
O fyw ar drydan nerfau,
A chyffro cyrff,
A geir un gusan laith
Neu anwes glyd,
Neu a gaf olwg ohonot o bellter clwyfus?
Ynteu a gerddi i’r lifft i’r seithfed llawr
Heb wybod fod y foment fawr ar fod?
(Neu ai i’w osgoi,
I wylo dros ynfydrwydd byw;
Neu ai’n ddifater ei?
Er poeni,
Ni allaf boeni mwy)
Y pryd hwnnw,
Os caf,
Fe gaf i ganu’n iach i’r lleill,
Rhai’n anwyliaid oes,
Codi llaw ar hwn a’r llall,
Ysgwyd llawn,
A choflaid.
Yna camaf tua’r limo gwyn
A ddaeth i’m cludo o’r tir newydd hwn
I’r hen hen fyd,
I’r lle y tarddodd amser, celf a llên
(a’r awch i ladd).
A’r pryd hwnnw,
Fel diwedd breuddwyd braf,
Fe ddoi i blith y lleill
Ac estyn llaw i mi i’w dal yn dynn.
Un olwg olaf wedyn, codi llaw
A dyna ni,
A minnau nawr
Yng nghlydwch soffa lledr du y limo hir,
Yng nghwmni gyrrwr boldew mud,
A bar wrth law,
A theithwyr byd yn bwrw golwg syfrdan,
Yn cyrchu tua Hartsfield
I gael esgyn fry i’r nen.