Bu gen i ryw uchelgais
Man a man cyfaddef
Cael gweithio o’r tu fewn.
Rhannu fy mhrofiadau y tu mewn i’r system
A chael fy nhalu –
Pum cant y mis am fod yn un o wybodusion Bwrdd yr Iaith.
Gwrthodwyd fi’r tro cynta
Ond ces i winc gan un neu ddau,
Gwna gais y tro hwn.
Rhyw bobol saff PC ddewiswyd y tro dwetha.
Bydd yn wahanol y tro hwn.
Ond nid felly fu.
Yr esgus?
Mae d’eisiau di y tu fas
I brocio,
Mae angen rhywun effeithiol y tu fas i’r system.
Gan ddweud ‘mae d’eisiau’
Y ces fy ngwrthod
I fod wastad ar y tu fas
I fod yn gacynen Socrates
I ddal i boeni
Feddyliodd neb, efallai,
Fod cacwn yn blino.