I fan hyn
mae’r dyn siwtiog yn dod
gyda’i ges du-clic-clic
sy’n cau ac agor mor effeithiol.
Ynddo mae swp papurau –
fe ges gipolwg syn –
Roedd ffolder â band lastig amdano
ac ar y clawr uchaf
ac ar sawl man arall mae’n siŵr
mae cylch o sêr.
Addas wedyn cael sêr o Lebkuchen i frecwast
gyda choffi cryf,
croissant a jam efallai
ac yna mae ganddo’r ‘Au ’voir’
ac egni digonol i gamu’n chwim
i ddal y bws rhif chwech,
a chlic-clic ei sgidiau’n atseinio ar y pafin
sy’n llawn plant a myfyrwyr,
rhai’n smygu, rhai’n darllen,
a hithau’n dal yn dywyll
a deugain baner yn cyhwfan o’u blaen.
Fe aiff e i un o ugain o bwyllgorau’r diwrnod
yn y Conseil d’Europe,
gyda channoedd tebyg iddo, dringa’r grisiau llydan
ac ar ddiwedd y prynhawn
aiff i newid ei siec wyth can Ewro
– am dreuliau dilys wrth reswm –
Yn y banc fer y fynedfa.
Mae’n cau ei waled.
Clic.