Fy ffrind, rho i’m wellhad o’r hen gyflwr hwn
– Pam wyt ti’n gweddïo’n hunanol, ni wn?
Wel, am gael blynyddoedd o wneud mwy o waith
– Ond cest ddigon yn barod o’r ddaearol daith.
Mae cymaint o hyd gen innau i’w roi
– Ond mae eraill yn aros ac mae’r byd yn troi.
Rwy’n arwain sawl mudiad ac mae gen i waith
– Efallai na fuest mor llwyddiannus chwaith.
Wel, rho im flynyddoedd i wybod y Drefn.
– Ble buost ti, felly, gyhyd ar dy gefn?
Rwy am werthfawrogi y pethau o bwys
– A dim ond yn awr rwyt ti’n meddwl yn ddwys?
Mae gen i neges am gariad a ffydd
– Fe fuost yn wamal am hyn yn dy ddydd.
Rwy’n derbyn yn llwyr na fûm i yn sant
– Pa gof fydd amdanat ym meddwl dy blant?
Oes gennyt un cyngor i mi ar fy rhawd?
– Ymlacia ac ildia, a derbyn dy ffawd.